Почитувани,

Со жалење констатираме дека од ОК ВМРО-ДПМНЕ Штип немаат капацитет да ги напуштат политиките на деструкција, блокади и ширење лажни вести.

Фактите за одличното работење на новата локална власт е невозможно да бидат оспорени, бидејќи граѓаните ги чувствуваат позитивните придобивки.

Намалена е цената на вода за пиење, обезбедени се средства за нова детска градинка, за допроектирање на брана на река Отиња, се преземени бројни инфраструктурни потфати за зголемување на квалитетот на инфраструктурата во на цела територија на Општина Штип. Новата локална самоуправа има слух за сите граѓани, во училиштата има бројни новини, а секојдневно се работи на нови проекти. Тоа е само мал дел од постигнувањата на новата локална власт изминатите сто дена.

Очајната финансиска состојба наследена од претходната неодговорна власт е стабилизирана во изминатите сто дена, а на сметката на Општина Штип има околу 20 милиони денари, и тоа после исплатени плати за вработените.

Недомаќинските и непродуктивни трошења во сите институции се укинати. Работиме домаќински, транспарентно и одговорно, во интерес на граѓаните.

Апелираме ОК ВМРО-ДПМНЕ Штип да ги напушти деструктивните практики на работа и конечно да се вклучи во работата на институциите, да ги застапува граѓаните, а не да ги изневерува сопствените гласачи со тоа што ги занемарува нивните интереси и потреби.