После 65 години локалната власт денес пушта во употреба нов мост на река Брегалница кој ќе го растерети сообраќајниот метеж во градот. Мостот „Иднина“ ги спојува населбите Пребег и Сењак и значително ќе придонесе во олеснување на протокот на работници и студенти од своите домови до работните места или до местата за студирање.

На овој настан денеска присутни беа претседателот на Владата, Оливер Спасовски, вицепремиерката, Мила Царовска и министерот за транспорт и врски, Горан Сугаревски.

Градоначалникот на Општина Штип, Благој Бочварски ја потенцираше важноста на оваа инвестиција за граѓаните на Штип.

„Само металната конструкција е со тежина од 240 тони, а заедно со сите останати елементи мостот има тежина од 670 тони. Мостот има две коловозни ленти, тротоар за пешаци, должина од 60 метри и широчина од 10 метри.

Заедно со овој мост ја изградивме и сообраќајницата која завршува со кружен тек на булеварот Гоце Делчев, во должина од 1200 метри на која поставивме 8400 метри квадратни асфалтна површина. Целата инвестиција на улицата, мостот, кружниот тек и уличното осветлување изнесува нешто над 60 милиони денари, инвестиција на Општина Штип.

Нека мостот „Иднина“ не поврзи, но и нека ни донесе хармонија, стабилност и просперитет на сите.

Ние сите заедно продолжуваме со напорна работа за иднината на сите граѓани овде во нашата татковина.

Нека ни е честит мостот „Иднина“, нека им служи на многу генерации,“ истакна Бочварски во своето излагање.

Премиерот Оливер Спасовски потенцираше дека она што е многу значајно е што локалната самоуправа, градоначалникот и Советот на општината, овој проект го реализираа целосно со пари од Буџетот на градот, односно од парите на граѓаните на општината. Ова е домаќински проект, од интерес за општината и за нејзините граѓани и тие можат сега да се уверат во тоа.

Свое поздравно обраќање имаа и министерот Сугаревски и вицепремиерката Царовска.

Квалитетната инфраструктура има најважна улога за економскиот развој, затоа Општините и Владата ќе продолжат посветено да работат на унапредување на патната мрежа во земјава, континуирано ќе го поттикнуваат развојот на сите региони и заеднички ќе продолжат да соработуваат за посилна економија и подобар живот на граѓаните.