Започнати се градежните активности за реконструкција на улицата Коле Неделковски. Се работи за комплетно вадење на коцката која беше стара и дотраена и замена на водоводната и канализационата линија. По овие зафати ќе следува поставување на асфалтен слој и реконструкција на пешачката површина односно тротоарите.

Градоначалникот Бочварски изврши увид во активностите на улицата Коле Неделковски.

„Започнавме со реконструкција на улицата Коле Неделковски. Променета е водоводната и канализациона линија со што ја подобруваме и подземната инфраструктура, ќе се работи на асфалтирање и реконструкција на тротоарите.

Се работи за површина од 1700 метри квадратни улица и околу 700 метри квадрати тротоари, инвестициската вредност е околу 4,2 милиони денари од кои 3,7 милиони денари се за реконструкција на улицата, а 500.000 денари за промена на водоводната и канализационата линија.

Граѓаните ќе имаат можност да увидат како сериозно се пристапува со реконструкција, а не како во некои претходни времиња кога асфалтот се поставуваше врз коцката,“ изјави градоначалникот Бочварски.

Локалната самоуправа во наредниот период ќе работи на неколку локации со цел реконструкција старата и дотраена патна инфраструктура.