Денеска 13.09.2018 г., во организација на Општина Штип се одржа дебата со претставници на невладините организации во врска со претстојниот референдум и важноста на истиот. Панелист на оваа дебата беше градоначалникот на Општина Штип, Благој Бочварски.

На дебатата присуствуваа луѓе од 26 невладини организации и најголем дел имаа свои излагања и ставови за тоа кои се придобивките од Европската Унија и НАТО.

„Денеска имавме состанок со поголем број на невладини организации и граѓански здруженија во Општина Штип. Разговаравме за едно од најважните прашања коешто ги тангира сите граѓани на Република Македонија пред коешто сме исравени сите во овој период, а тоа е референдумското прашање.

Разговарав со 26 невладини организации и граѓански здуженија коишто дадоа голема поддршка за овој договор којшто е постигнат, сакам да повторам дека ова е компромисно решение но ова е и решение коешто пред се и дава шанса на Република Македонија да оди напред и да се приклучиме кон Европската Унија и НАТО, да обезбедиме подобар живот за сите наши граѓани имајќи предвид дека во изминатите 27 години Република Македонија стои во место, граѓаните се иселуваат и неможат да обезбедат сопствена иднина и иднина на своите деца, а што е уште пострашно заминуваат со пасоши од странски држави.

Ние како одговорни чинители во ова општество, политичари, граѓански активисти, здруженија на граѓани имаме можност да разговараме на оваа тема и да носиме одлуки,“ истакна градоначалникот Бочварски.