Денеска градоначалникот на Општина Штип, Благој Бочварски, изврши увид во работата на работните единици на ЈП „Исар““ кои се фокусирани на реконструкција на водоводната линија.

Од средбите со граѓаните кои градоначалникот Бочварски редовно ги одржува произлегуваат голем дел активности, а со цел подобрување на нивното опкружување.

Ова беше барање од страна на жителите во овој дел од населбата, а ние како локална самоуправа и јавното претпријатие „Исар“ излегуваме во пресрет на потребите на граѓаните.

Станува збор за реконструкција на водоводната линија од околу 300 метри во населба Дузлачки Рид со која се овозможува подобро водоснабдување на околу 50 домаќинства од улица „Кирчо Димитриев“, кои во минатото имале сериозни проблеми со водоснабдувањето. Тие проблеми денеска се искоренуваат, а инвестицијата за овој проект чини околу 408.000 денари, средства обезбедени од буџетот на ЈП „Исар“.

„Ова е еден од проблемите кои ги нотиравме за време на предизборната кампања. Сакаме да покажеме дека суштински и темелно се зафаќаме со решавање на проблемите на граѓаните. Овде во претходниот период бил поставен слој асфалт, но барањата на граѓаните овде биле и претходно да се постави водоводна линија, бидејќи имаат проблем со застарената водоводна линија. Тоа не било направено, па денес тие имаат големи проблеми. Затоа решивме веднаш да се зафатиме со решавање на овој проблем на граѓаните коишто живеат овде,“ образложи градоначалникот Бочварски.

Освен со активностите овде, слични вакви активности има и во други делови од нашата општина.

Имено, работната единица Водовод и канализации при ЈП „Исар“ деновиве работи и на изведба на фекална канализација во Стар Караорман. Станува збор за долгогодишен горлив проблем на жителите на оваа населба, којшто конечно добива свое решение. Со изведбата на фекална канализација од околу 260 метри се овозможува приклучок на околу 80 домаќинства од горен Караорман на главна канализациона линија. Инвестиционата вредност на овој проект е околу 800.000 денари, а средствата се обезбедени од буџетот на Општина Штип.

„Паралелно со ова, со ЈП „Исар“ работиме и во населбата Караорман, каде се работи на изведба на поставување на канализациона мрежа. Покажуваме дека во овој период Општина Штип е вистинско градилиште. Работиме на инфраструктурни проекти, на улици, на тротоари, водоводи и канализации, со што Штип навистина во наредниот период ќе го добие сјајот којшто го заслужува,“ истакна градоначалникот Бочварски.