Денеска градоначалникот на Општина Штип, Благој Бочварски во својот кабинет ја прими наградата за најпријателски ромски градоначалник, која му беше доделена од страна на членовите на комисијата од ромските граѓански здруженија.

„На самиот почеток од мојот мандат, едно големо признание во кое бев избран, помеѓу повеќе градоначалници, повеќе Општини во Р. Македонија. Општина Штип е избрана за најпријателска Општина од страна на ромските организации и јас исто така како градоначалник. Со ова се почажува дека водиме грижа за сите граѓани на Општина Штип и ова го потврдува концептот на едно општество за сите. Во изминатиот период, иако беше зимски период, успеавме да изработиме неколку улици во нашиот град каде што има концентрација на ромско население. Веќе работиме на улицата „Косовска“, на подобрување на водоводната линија во нашиот град. Продолжуваме со засилена динамика и ова признание ќе ми даде уште посилен поттик да продолжам да работам во интерес на сите наши сограѓани“ – изјави градоначалникот Бочварски.

Наградата за најпријателски ромски градоначалник е доделена на основ на критериумите: дискриминација, медиуми, основни човекови права, здравство, образование. По овие критериуми Општина Штип од можни 40 поени освои, високи 34 поени. Како дел од наградата, градоначалникот ќе присустува на прогласувањето и промоцијата на градоначалниците во Брисел на 9ти април во Европскиот парламент за време на Ромската недела која што се оддржува од 8 до 12 април 2018 година низ ЕУ институциите во Брисел.