Денеска градоначалникот на Општина Штип, Благој Бочварски, направи увид во работата на екипите на ЈП „Стипион 2011“, коишто ги чистат отворените атмосферски канали во населбата Три Чешми.

Во продолжение следи изјавата на градоначалникот:

- Денеска се наоѓаме во населба Три Чешми, кадешто заедно со екипите на ЈП „Стипион 2011“ работиме на чистење на отворени атмосферски канали, коишто се во лоша состојба. Доаѓа пролетта и се очекуваат врнежи од дожд. Од Општина Штип мораме да бидеме подготвени за прифаќање на атмосферските води коишто се појавуваат при паѓање дождови, со цел да има проток на вода и да не настанат поплави напролет.

Затоа работиме на расчистување на каналите и денеска во Три Чешми се чистат околу еден километар атмосферски канали. Досега оваа активност ја вршевме на повеќе места во градот, како на пример на улиците „Васил Доганџиски“, „Тодор Коларов“, дел од улица „Питу Гули“ и „Христијан Карпош“, „Панче Караѓозов“ и „Вардарска“. Планирано е чистење на отворени атмосферски канали и во населба Осми Ноември.

На овој начин ги заштитуваме граѓаните од поплави и си го заштитуваме градот од штети коишто можат да се случат при поголеми врнежи во пролетниот дел од годината.

Што се однесува до уште еден проблем со којшто сум запознаен од граѓаните од населба Три Чешми, а тоа е проблемот со уличното осветлување, дадов налог веќе од утре овде да биде присутна екипа за одржување на уличното осветлување од ЈП „Стипион 2011“ и да ги заменат сите дотраени, оштетени и уништени улични светилки. На тој начин населбата Три Чешми ќе биде подобро осветлена во наредниот период.