Кадин Ана Џамија е главен верски објект на муслиманската популација во Штип. Додека џамијата Хуса Медин Паша има историско значење, Кадин Ана Џамија е во употреба и служи како објект во кој припадниците на исламската вероисповед ги извршуваат своите муслимански верски обичаи. Изградена е во 19 век, но прецизни податоци за тоа нема. Првобитната форма и надворешност на Џамијата се променети, со оглед на естетските градежни зафати што беа преземени пред неколку години.

Историски гледано, локацијата во строгиот центар на градот, спроти ООУ „Ванчо Прке” од десната страна на реката Отиња, отсекогаш било на еден начин природна локација за градски плоштад. Локацијата е регистрирана и на некои архивски фотографии, а разликата е во тоа некаде околу 70-тите години Градскиот плоштад е уреден  со мермерни плочки. Но забот на времето веќе оставил длабоки траги на Градскиот плоштад што ќе биде реконструиран. Според планот на Локалната самоуправа, уредувањето и реконструкцијата на Плоштадот ќе биде дел од поголемиот проект што ќе опфаќа и реконструкција на улицата „Ванчо Прке“.

Со современата и модерна адаптација, Градскиот плоштад ќе стане пристојно место за посета во Штип, не само за туристите и посетителите, туку и на самите Штипјани.

Културното богатство на Штип е огромно. Во градот и во блиската околина се регистирани над 300 цркви. Гордост на градот е црквата Свети Никола, која е седиште на Брегалничката Епархија. Голем дел од црквите се постари од 3 - 4 векови. Според староста, посебно се истакнува црквата Свети Јован Крстител што датира од 1350-тата година.

Црквата „Света Богородица” се наоѓа во Ново Село. Таа е едно од ремек - делата на познатиот македонски мајстор Андреа Дамјанов. Има форма на базилика со трокатни нивелации што му даваат посебен облик на кровот. Внатрешноста е богато украсена со растителни мотиви и животински фигури. Иконостасот е прекрасен дрворез. Според знакот што се наоѓа над влезот од јужната страна, црквата била реновирана во 1850 год. Според кажувањата на Штипјани, браќата Дамјанови ја граделе црквата 31 година. Каменот бил влечкан со дрвени коли, а бил обработуван рачно. Била формирана галерија на ретки икони на вториот кат. Денес таму има машки и женски олтар, бидејќи во црквата живееле и калуѓерки. Црквата имала скришно место каде револуционерот Гоце Делчев се криел. Во ѕидовите на храмот се лоцирани уште две места во кои се криеле околу 30 - тина други лица. Користејќи го тунелот што постоел под тронот на Архиепископот во црквата, а кој водел до куќите, востаниците се криеле и бегале од Турците.